Në këtë prioritet, gama e veprimtarisë e rrjetit “Sot për të Ardhmen” është e gjerë dhe përfshin edukimin dhe ndërgjegjësimin e komunitetit nëpërmjet fushatave mjedisore masive, seminareve mjedisore, edukimit mjedisor, aksioneve në komunitet dhe veprimtarisë ricikluese.

Nxitja e vullnetarizmit në shërbim të komunitetit është pjesë e metodologjisë së rrjetit në këtë drejtim. Për këtë “Sot për të Ardhmen” është shpallur dhe “Country Partner Albania” i GYSD (Global Youth Service) në rrjetëzim me YSA (Youth Service America) që nga viti 2014 e në vazhdim.

Java e shërbimit të vullnetarizmit në komunitet është organizuar tradicionalisht për 6 vjet me iniciativën e të rinjve të rrjetit “Sot për të Ardhmen” dhe numri i të rinjve në vitet e fundit është mbi 800 vullnetarë. Ata përmbushin çdo vit këtë veprimtari përmes aktiviteteve sensibilizuese të tilla si pastrimi i mjedisit, edukim mjedisor, riciklimi, si dhe shërbime në komunitet si ofrimi ndihmës për të moshuarit, më të vegjlit, moshatarët etj.

Që nga viti 2014 “Sot për të Ardhmen” është anëtar i Rrjetit të Shërbimeve Mjedisore. Ky rrjet është pjesë e programit “SENiOR-A Mbështetje për Organizatat Mjedisore të Shoqërisë Civile në Shqipëri”, e zbatuar nga Qendra Rajonale Shqipëri (REC) dhe financuar nga Qeveria Suedeze. Rrjeti është i përbërë nga 6 organizata: Auleda – Vlorë, Tjetër Vizion – Elbasan, Fondacioni Gjirokastra – Gjirokastër, Unë Gruaja – Pogradec, QZHK Sot për të Ardhmen – Durres, dhe Instituti i Kërkimeve Urbane – Tiranë, drejtues i rrjetit.

Qëllimi i rrjetit është nxitja e bashkëpunimit midis organizatave të shoqërisë civile me shtrirje gjeografike të ndryshme si dhe aktivizimi i aktorëve lokalë, rajonalë e qendrorë, bizneseve dhe subjekteve të tjera mjedisore, me synimin për të shtuar qasjen pjesëmarrëse, për të bashkuar nismat individuale të projekteve, për të forcuar sinergjitë dhe për të mbështetur njëri tjetrin në arritjen e rezultateve në një proces me përfitime konkrete publike në fushën e menaxhimit mjedisor

Në këtë kuadër, përveç punës për ndërgjegjësimin publik, “Sot për të Ardhmen” fokusohet në koordininimin me qeverisjen vendore dhe institucionet publike për të nxitur veprime dhe aksione që kontribuojnë në përmirësimin e situatës mjedisore, organizimit të debateve dhe seancave dëgjimore komunitet-qeverisje, si dhe analizave dhe monitorimeve të shërbimeve mjedisore, situatës mjedisore dhe dhënies së rekomandimeve, nëpërmjet tryezave të rrumbullakta, bashkërendimit me partnerët e rrjetit, konferencave dhe publikimeve të ndryshme, të cilat u paraqiten qeverisjes vendore, institucioneve të referencës, shoqërisë civile dhe qytetarëve, për të nxitur dhe promovuar angazhimin e tyre në prioritetet mjedisore në nivel rajonal dhe kombëtar.